Атап айтқанда, малды түгендеу және бағуға чиптері бар ноқта пайдалану ұсынылған. Алайда, мұндай жобаларға бюджеттік қаржыландыру көзделмейді — барлығы бизнестің өз қаражаты есебінен болуы керек. Сондықтан бұл технологиялардың қолданылуы екіталай.
Малды бағу үшін дрондарды пайдалану және табынды бағу және өрісін болжау үшін жасанды интеллектті қолдану да Үкіметтің орындалуы мүмкін емес ұсыныстарының бірі. Ірі шаруа қожалықтарында мұндай жобалар жүзеге асуы мүмкін, бірақ ірі қара мал басының көп бөлігі (8 млн бастың 45%-ы) жеке қосалқы шаруашылықтарда және шағын фермаларда шоғырланған, бұл үшін шаруплардың қаражаты да, білікті қызметкерлері де жоқ. Ауыл айналасындағы аз ғана малды бағу үшін жасанды интеллект пен дрон қажет емес.
Үкімет сонымен қатар Кешенді жоспарда қазақстандық ет үшін жаңа сыртқы нарықтарды ашу және қазақстандық компанияларды жеткізушілер тізіліміне енгізу мақсатын белгіледі.
Айта кетейік, қазір Қазақстаннан сиыр етін экспорттау тек квота аясында ғана мүмкін. Кешенді жоспар квота алушылар үшін қарсы міндеттеме енгізуді көздейді: оларды экспортталатын еттің кем дегенде 15%-ын ішкі нарықта төмендетілген бағамен сатуға міндеттейді.
Бұған дейін Қостанай облысының фермері Мереке Исмағұлов ElDala.kz порталына берген сұхбатында экспортты реттеу бойынша осындай ұсыныс жасаған болатын. Дегенмен, ол квоталарды мүлдем алып тастауды, сиыр етін экспорттауды ашық етуді, экспорт көлемінің 30%-на тең арзан бағамен ішкі сатуды ұсынды. Үкімет орташа нұсқаны таңдаған сияқты.